dombivali – राज्यात ऑनलाइन लॉटरीवर बंदी असतानाही, डोंबिवलीतील राम नगर, टिळक नगर, विष्णू नगर, मानपाडा, कल्याण परिमंडळ ३ पोलीस स्टेशनच्या हद्दीत खुलेआम अवैध ऑनलाइन लॉटरी सेंटर सुरू असल्याचा धक्कादायक प्रकार समोर आला आहे. राम नगर पोलीस स्टेशनच्या हद्दीत लॉटरी सेंटर गेल्या महिन्यात २७ ऑक्टो २०२५ पासून सुरु झाले असूनही राम नगर पोलिसांना याची काहीच माहिती नाही. हे अवैध ऑनलाइन लॉटरी सेंटर दिवसरात्र चालू आहे. अनेक गोरगरिबांचे संसार उद्ध्वस्त होत आहेत.
हे अवैध ऑनलाइन लॉटरी सेंटर आहुजा, भानुशाली नावाच्या व्यक्ती चालवत असल्याची माहिती समोर आली आहे.
राम नगर पोलिसांच्या नाकावर टिच्चून हा अवैध व्यवसाय सुरू आहे. पोलिसांच्या हद्दीत हा प्रकार घडत असूनही, पोलिसांना याची साधी कल्पना हि नाही. या अवैध ऑनलाइन लॉटरी सेंटरबाबत राम नगर पोलिसांना विचारणा केली असता ते माहिती घेऊन कळवतो असे उत्तर देत आहेत. तसेच ठाणे, कल्याण पोलीस कंट्रोलला माहिती घेतली असता त्यांनाही या लॉटरीबाबत काहीही माहिती नाही.
टिळक नगर, विष्णू नगर पोलीस स्टेशनच्या हद्दीत सुद्धा खुलेआम अवैध ऑनलाइन लॉटरी सेंटर दिवसरात्र सुरु आहेत. एकीकडे शासन ऑनलाइन लॉटरी आणि जुगारावर बंदी घालून सर्वसामान्यांची फसवणूक थांबवण्याचा प्रयत्न करत आहे, तर दुसरीकडे डोंबिवलीतील स्थानिक पोलीस स्टेशन कोणतीही कारवाई करत नसल्याने पोलिसांच्या कार्यपद्धतीवरच प्रश्नचिन्ह निर्माण झाले आहे. दिवसरात्र चालणाऱ्या या लॉटरीच्या नादात अनेक तरुण, नोकरदार, बिगारी काम करणारे, नशेच्या आहारी गेलेली लोक कमी वेळेत जास्त पैसे कमावण्याच्या आमिषाला बळी पडून आपली कष्टाची कमाई या जुगारात गमावत आहेत. याचा थेट परिणाम त्यांच्या कौटुंबिक जीवनावर होत असून, अनेक कुटुंबे रस्त्यावर आली आहेत.
त्यामुळे या गंभीर प्रकाराकडे पोलीस आयुक्त, पोलीस उप आयुक्त, सहाय्यक पोलीस आयुक्त आणि स्थानिक वरिष्ठ पोलिसांनी तातडीने लक्ष घालून, या अवैध लॉटरी सेंटर चालवणाऱ्या चालक मालकांवरती ताबडतोब कारवाई करावी तसेच यामागे असलेल्या पोलीस अधिकाऱ्यांचीही चौकशी करून, दोषींवर कारवाई करण्यात यावी अशी मागणी जोर धरत आहे.
