bhivandi – ए.टी.एम.कार्ड हातचलाखीने बदली करून नागरिकांची फसवणूक करणाऱ्या दोघांना शांतीनगर पोलिसांनी अटक करून वेगवेगळ्या बँकाचे एकूण ३५ ए.टी.एम. कार्ड आणि रोख रक्कम हस्तगत केली आहे. अबुलबशर रईस खान आणि मोहम्मद हशीम हयातुल्ला शाह अशी या दोघांची नावे आहेत.
याबाबत वृत्त असे आहे कि, अबुशहमा अब्दुल्ला अन्सारी हे बागे फिरदोस एच.पी.पेट्रोल पंपाच्या समोर, भिवंडी येथे असलेल्या ए.टी.एम. मशीनमध्ये पैसे काढण्याकरीता गेले असता, अनोळखी इसमांनी त्यांची नजर चुकवून ए.टी.एम. कार्ड हातचलाखीने बदली करून व पासवर्ड बघून त्यांच्या खात्यातून १४,०००/- रूपये काढून घेतले असल्याबाबत शांतीनगर पोलीस ठाण्यात गुन्हा दाखल करण्यात आला होता.
सदर गुन्ह्याच्या अनुषंगाने पोलिसांनी तपास करून मिळालेल्या माहितीच्या आधारे अबुलबशर रईस खान आणि मोहम्मद हशीम हयातुल्ला शाह दोघांना अटक करून त्यांच्याकडून वेगवेगळ्या बँकांचे एकूण ३५ ए.टी.एम. कार्ड, ५,१००/- रूपये रोख रक्कम हस्तगत केली आहे.
