कल्याण – २ वर्षांपूर्वी न्यायालयीन कोठडीत असताना कोरोनटाईन सेंटर मधून पळालेला, मोक्का कायद्याअंतर्गत ४ गुन्हयात पाहिजे आरोपी तसेच जबरी चोरी (चैन स्नॅचींग), मोटार सायकल चोरी करणाऱ्या सराईत गुन्हेगारास खडकपाडा पोलिसांनी अटक केली.
याबाबत वृत्त असे आहे कि. फिर्यादी यांची सोसायटीच्या आवारात पार्क करून ठेवलेली मोटार सायकल कोणतरी अज्ञान इसमाने चोरी केलेबाबत खडकपाडा पोलीस ठाण्यात गुन्हा दाखल करण्यात आला होता. सदर गुन्ह्याच्या अनुषंगाने पोलिसांनी तपास केला असता, मोटारसायकल चोरी व जबरी चोरी करणारा इसम हा लहुजीनगर, मोहने, कल्याण (प) येथे येणार असल्याची माहिती पोलिसांना मिळाली होती. मिळालेल्या माहितीच्या आधारे पोलिसांनी सदर ठिकाणी सापळा रचून सदर इसमास अटक केली.
त्याच्याकडे चौकशी केली असता त्याने मोटार सायकल चोरी, जबरी चोरीचे एकूण १२ गुन्हे केल्याचे तसेच तो त्यामधील मोक्का कायदयाअंतर्गत ४ गुन्हयामध्ये पाहिजे आरोपी असल्याचे निष्पन्न झाले. आणि सदर इसम मोक्का कायद्याअंतर्गत गुन्हयात न्यायालयीन कोठडीत असताना कोविड काळात टाटा आमंत्रण, कोरोनटाईन सेंटर, भिवंडी येथून पळाला होता. त्याबाबत कोनगाव पोलीस ठाण्यात गुन्हा नोंद आहे. त्यानंतर तो २ वर्षापासून पोलीसांना चकमा देत होता. सदर अटक आरोपी हा मोटारसायकल चोरी व जबरी चोरी करणारा सराईत गुन्हेगार आहे.
त्याने ठाणे जिल्ह्यात कल्याण, भिवंडी, उल्हासनगर, अंबरनाथ, डोंबिवली तसेच मुंबई, नवी मुंबई अशा विविध शहरांमध्ये मोटार सायकल चोरी व जबरी चोरीचे गुन्हे केल्याचे सांगितले. दरम्यान पोलिसांनी त्याच्याकडून एकूण ३ चोरीच्या मोटार सायकली हस्तगत केल्या आहेत.
