ठाणे – राज्य उत्पादन शुल्क विभागाच्या पथकाने मोठी कारवाई केली आहे. बनावट विदेशी मद्यासह बीएमडब्लू कार जप्त करून दोघांना अटक केली. संदीप रामचंद्र दावानी आणि हनुमंत दत्तु ठाणगे अशी या दोघांची नावे आहेत.
बनावटी विदेशी मद्याचा साठा लपवून ठेवल्याची माहिती राज्य उत्पादन शुल्क कल्याण विभागाच्या अधिकाऱ्यांना गुप्त बातमीदाराने दिली होती. मिळालेल्या माहितीनुसार भरारी पथक ठाणे, राज्य उत्पादन शुल्क कल्याण विभागाच्या पथकासह भिवंडी आणि उल्हासनगर निरीक्षक राज्य उत्पादन शुल्क विभागाने संयुक्त कारवाई केली.
संयुक्त कारवाईत पथकाने गोडवून गाळा नं. ५, मु. देवरूंग, पो. लोनाड, कल्याण पडघा रोड, ता. भिवंडी, जि. ठाणे या ठिकाणी साठा केलेले दमण व हरीयाणा राज्य निर्मित तसेच महाराष्ट्र राज्यातील बनावट मद्याच्या साठ्याचे एकूण २६६ बॉक्स जप्त केले. तसेच पार्किंग नं. १००३, व्हरटेक्स स्कायव्हिला बिल्डिंग, रिलायन्स मार्ट जवळ, कल्याण मुरबाड रोड, कल्याण (प), ता. कल्याण, जि. ठाणे या ठिकाणी पथकाने छापा टाकून पार्किंगमध्ये उभ्या असलेल्या BMW कारमध्ये दमण राज्य निर्मित विदेशी मद्याचे एकूण २५ बॉक्स जप्त केले.
अशा रितीने सदर कारवाईमध्ये पथकाने एकूण २९१ बॉक्स व इतर साहित्य जप्त करून दोघांना अटक केली असून मुख्य आरोपी दिपक जियांदराम जयसिंधानी फ़रार असून त्याचा शोध घेण्याचे काम सुरू आहे. सदर कारवाईमध्ये एकूण रू. ५६,७५,६४०/- इतक्या किंमतीचा मुद्देमाल जप्त करुन सदर आरोपींविरुद्ध कारवाई करण्यात आली असून गुन्हा नोंद करण्यात आला आहे.
दरम्यान, जप्त मुद्देमाल हा जुन्या कपड्याच्या गोण्यामध्ये लपवून ठेवून महाराष्ट्र राज्यात आणल्याचे उघडकीस आले आहे. तसेच फरार आरोपी दिपक जियांदराम जयसिंघानी याच्या नावे BMW कार असून त्यांचे नावे मुंबई शहर उपनगर जिल्ह्यामध्ये वाईन शॉप असल्याचे निर्दशनास आले आहे.
