ठाणे – सोन्याचे दागिने आणि ४ मोटार सायकल असा एकूण रू. ८,५१,०००/- चा (आठ लाख एक्कावन्न हजार रूपये) मुद्देमाल हस्तगत करण्यात गुन्हे शाखा, घटक-१, ठाणे पोलिसांना यश आले आहे.
याबाबत वृत्त असे आहे कि, पोलिसांनी मिळलेल्या माहीतीच्या आधारे पाचपाखाडी, ठाणे येथे सापळा रचून सुनील रामबरण गोयल उर्फ रंभा उर्फ पप्पी यास अटक केली. त्याच्याजवळ १ देशी बनावटीचे पिस्टल, २ जिवंत काडतुसे आणि १ मोटर सायकल मिळून आले. त्याच्याकडे याबाबत केलेल्या चौकशीत सदरचे पिस्टल मित्र प्रथमेश ढमके उर्फ पिल्या याने दिले असल्याचे त्याने सांगितले आणि बुलेट मोटार सायकल सन्जो उर्फ सहेजाद मोहमद शहा याने दिली असल्याचे सांगितले.
त्याच दरम्यान पोलिसांनी मिळालेल्या माहितीच्या आधारे जळगाव येथून प्रथमेश ढमके उर्फ पिल्या यास अटक केली होती. त्यानंतर प्रथमेशकडे केलेल्या चौकशीत त्याच्याकडून एकूण रू. ४,२१,०००/- (चार लाख एकवीस हजार रूपये) किंमतीचे सोन्याचे दागिने आणि एकूण रु. ४,३०,०००/- (चार लाख तीस हजार रूपये) किंमतीच्या ४ मोटार सायकल असा एकूण रू. ८,५१,०००/- चा (आठ लाख एक्कावन्न हजार रूपये) मुद्देमाल हस्तगत केला.
