कल्याण – कल्याण रेल्वे स्टेशनच्या वेटिंग रूममधून एका ४ वर्षाच्या मुलाचे अपहरण करण्यात आल्याची घटना घडली असून, सदर प्रकरणी गुन्हे शाखा, कल्याण युनिट, लोहमार्ग पोलिसांनी तपास करत या मुलाचा शोध घेऊन त्याच्या आई-वडिलांच्या ताब्यात दिले. तसेच अपहरणकर्त्याला अटक केली. कचरू केशव वाघमारे उर्फ बाळा असे या अपहरणकर्त्याचे नाव आहे.
मिळालेल्या माहितीनुसार मोलमजुरीचे काम करणारे करण गुप्ता व त्याची पत्नी शुभांगी गुप्ता हे आपल्या २ मुलांसोबत (कीर्ती आणि अथर्व) कपडे धुण्यासाठी रेल्वे स्टेशनवरील वेटिंग रूममध्ये आले होते. त्यावेळी साबण नसल्यामुळे त्यांनी तेथे एक जोडपे आपल्या ४ मुलींसोबत होते. त्यांना मुलांवर लक्ष ठेवण्यास सांगून दोघेही साबण आणण्यासाठी बाहेर गेले. त्यानंतर परत ते त्या ठिकाणी आल्यावर पाहतात तर तेथे फक्त कीर्ती एकटीच होती. अथर्व तसेच वेटिंग रूम मध्ये असलेल्या 4 मुली व ते जोडपे तेथे नव्हते.
दरम्यान, गुप्ता यांनी आजूबाजूला मुलाचा शोध घेतला. मात्र, मुलगा आढळून आला नाही. अखेर त्यांनी याबाबत कल्याण रेल्वे गुन्हे पोलीस ठाण्यात तक्रार दिली. त्यानंतर पोलिसांनी तात्काळ तपस करता अपहरणकर्ता कचरू वाघमारेला अटक केली आणि मुलाची सुटका केली.
