७ मुलींना बाहेर काढण्यात यश तर २ मुलींचा मृत्यू…
पुणे – खडकवासला धरणात पोहण्यासाठी गेलेल्या ९ मुली बुडाल्या असल्याची घटना घडली असून, बुडालेल्या ९ जणींपैकी ७ मुलींना धरणातून बाहेर काढण्यात यश आले आहे. परंतु, २ मुलींचा मृत्यू झाला आहे. गोऱ्हे खुर्द गावच्या हद्दीत ही घटना घडली.
मिळालेल्या माहितीनुसार कलमाडी फार्म हाऊस जवळ खडकवासला धरणाच्या पाण्यात ९ मुली पोहण्यासाठी उतरल्या होत्या. पाण्याचा अंदाज न आल्याने सर्वच्या सर्व ९ मुली पाण्यात बुडू लागल्या. यावेळी जवळच दशक्रिया विधीसाठी आलेल्या स्थानिकांनी मुलींना वाचविण्यासाठी धाव घेतली. आणि त्यातून ७ मुलींना वाचवण्यात यश आले.
मात्र उर्वरित २ मुलींचा शोध लागत नसल्याने स्थानिकांनी तातडीने ही माहिती हवेली पोलीस ठाण्याला दिली असता पोलीस घटनास्थळी दाखल झाले. तसेच पुणे महानगर प्रदेश विकास प्राधिकरणाच्या अग्निशमन दलाला पाचारण करण्यात आले. आणि उर्वरित २ मुलींचे मृतदेह बाहेर काढण्यात आले.
