कल्याण – रेल्वेत चोरी करणाऱ्या एका सराईत चोरट्यास गुन्हे शाखा, युनिट ३, कल्याण, लोहमार्ग पोलिसांनी अटक केली. सुभान अहमद जहीर अहमद असे या चोरट्याचे नाव असून पोलिसांनी त्याच्याकडून एकूण ७,२९,४९८/- रु. किंमतीची मालमत्ता त्यात १२४.५ ग्रॅम वजनाचे सोन्याचे दागिने जप्त केले.
फिर्यादी अहमदाबाद- कोल्हापूर एक्सप्रेसमध्ये प्रवास करत असताना सदर रेल्वे सुरत ते भिवंडी रेल्वे स्टेशन दरम्यान धावत असताना कोणीतरी अज्ञात इसमाने फिर्यादी यांची डोक्याजवळ ठेवलेली पर्स आतील १२४. ५ ग्रॅम वजनाचे सोन्याचे दागीने, मोबाईल फोन व रोख अशी एकूण ६,४५०००/- रूपये किंमतीच्या ऐवजासह चोरून नेले असल्याबाबत दिलेल्या तक्रारीवरून डोंबिवली रेल्वे पोलीस ठाण्यात गुन्हा दाखल करण्यात आला होता.
सदर गुन्ह्याच्या अनुषंगाने पोलिसांनी सीसीटीव्हीच्या आधारे तपास करून सुभान अहमद जहीर अहमद यास भायखळा येथून अटक केली. तसेच त्याच्याकडून कल्याण रेल्वे पोलीस ठाण्यातील ३ आणि डोंबिवली रेल्वे पोलीस ठाण्यातील १ असे एकूण ४ गुन्हे उघडकीस आणून एकूण ७,२९,४९८/- रु. किंमतीची मालमत्ता त्यात १२४.५ ग्रॅम वजनाचे सोन्याचे दागिने जप्त केले.
दरम्यान, सुभान अहमद जहीर अहमद हा रेकॉर्डरवरील सराईत गुन्हेगार असून त्याच्याविरुद्ध कल्याण, पुणे, भुसावळ, भरूच (गुजरात) येथील रेल्वे पोलीस ठाण्यात गुन्हे दाखल आहेत.
