कल्याण – कल्याण पश्चिम रेतीबंदर परिसरात काही दिवसांपूर्वी मध्यरात्रीच्या सुमारास दारूच्या नशेत काही तरुणांनी धिंगाणा घातल्याचा प्रकार समोर आला आहे. हे तरुण भरधाव वेगाने गाडी चालवत गाडीमध्ये मोठ मोठ्याने धार्मिक गाणे लावत धिंगाणा घालत होते. सदर प्रकरणी या ४ तरुणांना बाजारपेठ पोलिसांनी अटक केली. तुषार गाढवे, नितीन भोंडिवले, आकाश सानप, प्रथम पवार अशी अटक करण्यात आलेल्या तरुणांची नावे आहेत.
याबाबत वृत्त असे आहे कि, रेतीबंदर भागात मध्यरात्री ४ तरुण एका कार मधून रेतीबंदर भागात आले. आणि त्यांनी मोठ मोठ्याने धार्मिक गाणे लावत रस्त्यावर धिंगाणा घालण्यास सुरुवात केली. दरम्यान या आवाजाने तेथील लोक जागे झाले. हे तरुण दारु पिलेले असल्याने काहीतरी चुकीचे घडू शकते या भीतीने तेथील लोकांनी तात्काळ बाजारपेठ पोलिसांना कळविले. त्यानंतर बाजार पेठ पोलीस ठाण्याचे API रुपवते यांच्या मार्गदर्शनाखाली डिटेक्शन ब्रांचचे सचिन साळवी आणि प्रेम बागुल तातडीने घटनास्थळी पोहचले आणि त्यांनी या तरुणांना अटक केली. हे तरुण उच्चशिक्षित असल्याचे पोलीस चौकशीत समोर आले आहे.
दरम्यान, धडक कारवाई करत परिस्थितीवर ताबा मिळवत घडलेला प्रकार यशस्वीरीत्या हाताळ्याने सचिन साळवी आणि प्रेम बागुल यांचे सर्व स्तरातून कौतुक होत आहे.
