ठाणे – नांदेड, हिंगोली या जिल्ह्यातील शेतकऱ्यांनी कष्टाने पिकविलेल्या धान्याची तसेच भिवंडी परिसरातील गोडावुन परिसरात कॉपर कॉइल्स घरफोडी चोरी करणाऱ्या आंतरराज्यीय टोळीतील ४ गुन्हेगारांना गुन्हे शाखा घटक – १ ठाणे पोलिसांनी अटक करून एकूण रु. ३,६३,४५०/- किंमतीचा मुद्देमाल हस्तगत केला. शफतउल्लाह चौधरी, हैदर शेख, जमील मलीक आणि शेर खान अशी यांची नावे आहेत.
भिवंडी तसेच राज्यातील इतर भागात घरफोडी करणाऱ्या टोळीतील काही इसम कल्याणफाटा येथे येणार असल्याची माहिती पोलिसांना मिळाली होती. मिळालेल्या माहितीच्या आधारे पोलिसांनी सदर ठिकणी सापळा रचून शफतउल्लाह, हैदर आणि शेर खान यांना अटक केली. त्यांच्याकडे केलेल्या चौकशी नंतर त्यांचा साथिदार जमील मलिक यालाही पोलिसांनी अटक केली.
दरम्यान, शफतउल्लाह, हैदर आणि शेर या तिघांविरोधात भिवंडीसह नांदेड, हिंगोली येथेही गुन्हे दाखल असल्याचे समोर आले आहे. या तिघांचा ताबा हिंगोली पोलिसांना देण्यात येणार असल्याचे पोलिसांनी सांगितले.
